Pedra da Arca

Coñecida tamén como Casa dos Mouros, é un dos monumentos megalíticos de maior tamaño de Galicia. Conserva aínda boa parte do volume do seu túmulo de terra e a maior parte do dolmen co seu corredor, faltando só a laxe posterior que pecharía a cámara.

Na cámara e na tampa de cubrición pódense ver 2 cruces gravadas que poderían ter funcionado en tempos históricos como cruces de termo, xa que o dolmen localízase no linde entre as parroquias de Baiñas (Vimianzo) e Olveira (Dumbría).

No interior da cámara consérvanse tamén restos de gravados e pinturas vermellas prehistóricas. O motivo máis destacado dos gravados é un deseño localizado igualmente noutros dolmens do Noroeste como Dombate, a Anta de Espiñaredo ou, perto do Douro, Chá de Parada. Foi chamado «The Thing», pola arqueóloga irlandesa Elisabeth Shee e o termo popularizouse ata hoxe en día. Existen varias interpretacións sobre o que pode representar este símbolo, algúns cren que se trataría dun machado, pero tamén se ten apuntado á figura dun cachalote. En calquera caso parece claro que era unha figura de alto valor simbólico pola frecuente presenza nas cámaras megalíticas da Península ibérica. Na Pedra da Arca  hai en concreto 2 figuras deste tipo que aparecen gravadas xunto a liñas onduladas e outros trazos de difícil interpretación.

Un dato interesante é que o dolmen está construído con 3 tipos de rochas diferentes presentes todas na contorna inmediata excepto a laxe na que aparecen os gravados que é de granodiorita e tivo que ser traída desde 3 quilómetros de distancia.