Circuit des familles / Familien itzulia

Merkatu plazan, Chez Doxpi jatetxearen parean, bi ezpel hesien arteko bidea hartu, gaztelurantz. Bidearen bukaeran, joan ezkerrera, errepidetik. Ezpeletako Biperraren Sindikatuaren eraikina utzi, joan eskuinera eta gazteluaren aitzinetik pasatu. Hartu frontoiaren eta gazteluaren arteko errepidea, eta pilota plaza eta gero, ezkerreko eskailerak jaitsi. Behera iritsi, eta etxe handi baten ondotik, berehala, joan ezkerrera. Berdegune batera daramaten beste maila batzuk jaitsi. Erreka zeharkatzen duen zubixkaren gainetik joan, eta bi hormatxoen arteko pasabidetik ibili, baina ez luzaz.

Bidearen bukaeran, karrika batera iritsi, eta joan ezkerrera, kanpoko leiho gorridun etxe eder batzuen artetik, elizarantz. Bidegurutze batera iritsi, eta joan eskuinera, eztiki igotzen den errepidetik. Errepide honetan 270 m ibili, eta joan eskuinera, bi etxetako baratzeen arteko bidexka hertsi batetik. Joan ezkerrera, hesiaren bazterretik, eta 200 m ibili. Ongi ageri den bidexka horretatik segitu. Bidexkaren bukaeran, errepidea bururatzen da ere. Joan ezkerrera, oihanpe batetik doan bidetik. Eta Ezpeletako biperraren ateleriaren heinean dagoen errepidera iritsi.

Errepidean, joan ezkerrera. 100 m ibili ondoan, arrotz gelen heinean, joan eskuinera, hesi baten bazterretik doan bidexka ttipi batetik. 270 m ibili ondoan, errepidera iritsi eta joan eskuinera. Errepide horretatik jaitsi eta 350 m ibili. Orduan, eskuineko bidea hartu. Jaitsiera labur baten ondotik, bidea mundrunatua bilakatzen da eta bizitegi baterantz darama. Ezkerretik jarraitu. Segitu bide belartsu horretatik, errepidera iritsi arte. Orduan, joan ezkerrera. Bihurgune baten heinera iritsi, eta joan eskuinera, bide batetik. Ibilbideak aitzina segitzen du, erreka baten bazterrera iritsi arte. Errekaren eskuineko hegitik ibili, haritz ederreko parke batera iritsi arte.

Biratu eskuinera. Bide-adarkatzean, hartu bidexka bat ezkerrera, eta eskuinaldeko hesiaren bazterretik ibili. Jaitsi bidexkatik, Biper Gorri kanpinaren sarrerara iristeko. Zubia zeharkatu, eta joan ezkerrera, igotzen den errepidetik. 250 m ibili ondoan, iritsi bidegurutze batera eta joan ezkerrera. Pasatu edukiontziak, eta, gero, joan eskuinera bide batetik. Bidearen beherean, hesi baten heinera iritsi. Hesia pasatu eta pentzera igotzen den bide baten ezkerraldean dagoen bidexka zabaletik joan. Bigarren hesia pasatu eta erreka ttipi bat zeharkatu. Segitu gora doan bidexkatik, pentze batera iritsi arte.

Isolatutako haritz handi baten heinean, joan ezkerrera, negutegietarantz. Negutegien heinean, joan eskuinera. Hesiaren bazterretik ibili, atexka ttipi bateraino. Atexka pasatu eta hetsi, eta errepidean joan eskuinera. Errepidean 100 m ibili ondoan, joan eskuinera, bide batetik. Bidearen amaieran, errepidera iritsi eta hura zeharkatu. Jaisten den bidexka zabal batetik joan. Oihanpean ibili eta zubixka bat zeharkatu. Ondotik, patarrean gora joan. Bidegurutze batera iritsi, eta joan ezkerrera bidexka batetik.

Bi argigune eder zeharkatu eta oihanpetik jarraitu. Oihanean sartu eta 50 m-ra, bidexka nagusitik bereizten den bidexka hertsi batetik joan. Bidexka bat baino gehiagoko bidegurutze batera iritsi. Zubixkaren gainetik erreka zeharkatu ondoan, arras ezkerrean dagoen bidetik joan. Lehenik, oihanpean, joan ezkerrera eta pentze baten luzeran ibili. Gero, haritzen artetik segitu, eta bide horren bukaeran, errepide batera iritsi. Joan eskuinera. Lehen bidegurutzean, joan berriz eskuinera. Errepidearen bukaeran, joan ezkerrera, erromatar zubia zeharkatzeko.

Pareko errepidetik joan. Stopera iritsi, joan ezkerrera, herri barnerantz gora doan karrikatik. Pasatu Pottoka jatetxea, eta joan eskuinera. Karrika nagusian, joan ezkerrera, okindegiaren eta bankuaren artetik, eta, gero, hartu lehena eskuinera, merkatu plazara iristeko.