Sentier des douaniers

Bidearen bihurgunetik (80 m), ezkerrean den bide harritsu bat igotzen hasi, erreka bat baino gorago (“GT2 lotura” bide seinalea). 200 m gorago, T itxurako bidegurutzean (gogoan hartzekoa itzultzeko), eskuineko bidea segitu. Lehen oihan batetik iragaten da, eta oihanbide zabal batera jaisten da, zuzen segitu behar duzuna. Lizarlan etxaldearen heinean, zuzen segitu jaisten den bidexka belartsuan. Oihanetik, bidexka Lizarlan errekaren ohera iristen da beherago, eta eskuineko hegitik jaisten segitzen du.

Ezker, zubixka batek (13 m) erreka zeharkatzeko bidea ematen dizu. Beste hegian, GRT2 bidean den eskuinaldeko atexka bati kasurik ez egin (aurriak), parean den horiz seinalatutako bidexkan egoteko. Zut igotzen da ezkerrera eta kasko borobildu oihantsuan sartzen, non atseden hartuko duzun gogotik haritz eder batzuen itzalpean. Bidasoa ibarrerako ikuspegiaren ondotik, bidexkak desnibel arrokatsu bat iragaten du (275 m inguru) eta bere igoaldi zorrotza segitzen du. 3 zk. mugarriaren ondotik ibiliz, azkenean, malda eztitzen da; zure parean, Azkopeko mendixka zeharkatzen duen bide belartsua segitu (375 m). Beste aldera jaitsi lepo baterantz.

5 zk. mugarriak seinalatzen duen lepoan (360 m), eskuineko bide zabalari kasurik ez egin, parean den mugako bidexka zuta segitzeko, zuhaitzen bazterretik igotzen dena. Patarraren tontorrean (6 zk. mugarria), Larrunerako eta Ibantelirako ikuspegi ederra aurkitzen dugu. Azal arrokatsuen eskuinetik pasatzen da bidexka, arrokan zizelkatua, eta berriz tontor-lerroaren ezkerretik, lepo belartsu batera heltzeko (465 m). Lehen elorri zuritik, tontor-lerroa utzi ezkerrera joanez, bidexka berri baten abiapuntua topatzeko. Luzaz isurialde mazelan iraganen da, Ihilepora iritsi arte.

Ihilepoan (421 m), bestaldeko isurialdera joan eta gorriz eta zuriz (GR10) seinalatutako bidexka segitu (doi bat ezker). Xoldokogainako aintziraren gainetik erregulartasunean jaisten da eta Pitare lepora heltzen da (316 m). GR seinaleari kasurik ez egin eta arrunt ezkerraldera joan, oihaneko zokoan, segidan bi adarretan bereizten den bidean: ezkerraldean, oihanean sartzen dena hautatu. Bidea oihan barnean jaisten da bi bihurgune handitan, eta erreka baten bazterretik doa. Lurrezko bidera iritsi eta (221 m), erreka zeharkatu eta eskuineko bidea segitu.

Lantzetaerrekako gurutze itxurako bidegurutzean (200 m), bi bide eskuinean utzi, eta ezkerrera jaisten den bidea hautatu. 200 m beherago, ezkerrera itzuli haritz ohargarri baten azpian eta Lantzeta errekaren ohera heldu. Ondotik, bideak ezkerreko hegia segitzen du eta etortzerakoan topatutako lehen bidegurutzera heltzen da: eskuineko bidea jaitsi aparkalekura itzultzeko.