De col en col / Lepoz Lepo

Du parking de Sare (70 m), aitzina zaitez elizara buruz eta itzul eskuin elizaren eta Herriko Etxearen artean errebotera heltzeko. Igerilekuaren eskuinetik pasatu oinezko bidea aurkitzeko, karabanendako aparkalekura iristen dena. Aparkalekuaren ezkerretik ibili (50 m-tan), eta D406 errepideko bidegurutzea zuhurki zeharkatu, parean den bidea segitzeko, Basaburua auzora igotzen dena. Azken bihurgunean, pareko kanadar pasabidearen gainetik iragan eta, azaltzen diren bi bidexketatik (Aldunberria), eskuinekoa hautatu. Zuhaitzen azpitik igotzen da lepo ttipi bateraino (jabego pribatua): ezkerrera joan, lehen bidean. Oihanetik ateratzen da lur muino panoramiko baten heinean, eta eskuineko mendi gainetik doa.

Y itxurako lehen bidegurutzean (210 m), ezkerreko bidexka hartu kasko borobildu luze bat igotzeko (urtegi baten ondotik pasatu). Gorago, zati belartsu eta eztiago batetik iragan, eta azken patar zut batera heldu: zuzen igo bidexka harritsuan, gero lurrezkoa bilakatzen dena. Igoaldi zuzen honen ondotik, laugune batera heldu, nondik Larrun gailurra eta Donibane Lohizuneko itsasadarra ikusten diren. Ezkerreko bidexka belartsuan segitu, goi-zelairantz (513 m, pinu zenbait), Larrungo burdinbidera iristeko zeharkatzen duguna. Burdinbidearen ezkerraldetik ibili, 1 km-tan, Altsangako hego-isurialdean.

Iturriederreta lepoan (543 m), 141 zk. zutabearen heinean, burdinbidea utzi, horiz seinalatutako bidexka hartzeko ezker, iratze artean, elektrizitate linearen justu eskuinetik igotzen dena. Bidexka linearen azpitik pasatzen da, zuhaitz arraxindun landa baten zokoan, eta mendi gain arrokatsu batean agertzen den lepora zuzen segitzen du. Urkilako arraila iragan (715 m) eta bestaldeko isurialdeko bidexka bakarrean jaitsi, pudinga mokorren artetik. 5 m urrunago, T itxurako bidegurutzean, bidexka ezkerraldera jaitsi. Abere hespilaren heinean, zuzen segitu, iratze eta oteen artetik, goi-zelai belartsuaren aldera (seinaleak ongi segitu).

Fageko artzain-zelaiaren sarbidean, Y itxurako bidegurutzean (560 m), eskuineko bidea hautatu. Laugune batetik iragan, eta pareko ibar-zuloan jaisten hasi (Espainiarako ikuspegia), eskuineko bi bidexkei kasurik egin gabe. Arrokak agertzen diren heinean, ezkerrera joan lurrezko bidexkan. Lur muino baten ondotik (Ibantelirako ikuspegia), bidexkak mendi gain arrokatsuaren hego-isurkiaren mazela zeharkatzen du. Puntan (450 m), pinu eta haritz oihan baten azpitik eskuin pasatu, gero bidexka ezkerrera baztertzen da beste ibarxka bat topatzeko eta lepo batera jaisteko.

Olhaingo kaperaren azpian kokatutako lepoan (348 m), joan-etorri bat egin daiteke aurrietaraino edo atseden hartu eskuinean den arditegi ederraren ondoan. Ezkerrera jaitsi bide onetik. Eskuin aldean den bordari kasurik ez egin, eta, erreka zeharkatu eta gero, bidexka gordean eskuin hartu; errekaren bazterretik doa eta gero errekatik urruntzen da urratsez urrats. Etxegarai bide harritsuko bihurgunera heldu (Sararako ikuspegia): parean jaitsi mundrunezko bidera heldu arte (aparkalekua), 300 m-tan eskuinaldera jaisten duguna.

Bordarekiko pentzearen heinean (181 m), mundrunezko bidea utzi, ezkerrean duzun bide gorri iluna hartzeko (Y itxurako bidegurutzean berriro ezker). Harri altxatutako hesi ederraren bazterretik doa, eta herrixka batera jaisten da. Eskuineko bidean jaitsi, eta, T itxurako bidegurutzean (eztitegia), jaitsiera ezker segitu, ezkerretik datozen bi bide utziz, horien artean Lezabeko zubi lauzatu ederra. D406 errepidean zarelarik, Sararako bidea segitu ezker. Zubiak pasatu eta, eskuineko bazter zabalek platanoen azpitik ibiltzeko bidea ematen dizute. Karabanen aparkalekuan, igerilekura igotzen den oinezko bidea berriz harrapatu eta Sarako plazara helduko zara.